05 Jan 2024: Nizan atang khan Thingsai khuaah “Thiamna leh Taimakna” tih thupui hmangin ‘Saikhawpui Kut’ hman niin, Kut Pa atan Gauhati High Court Judge, Justice Michael Zothankhuma hman a ni.
Saikhawpui Kut hmanna pui ber chu vawiin chawhma khan Gov’t High School kawtzawlah hman niin, Kut Pa Justice Michael Zothankhuma chuan, Thingsai khua chu khaw hmingthang leh lar tak mithiam tam tak chhuahna a ni a, hetianga khaw hmingthang anih theihna chhan chu Thingsai Lal khan zirna hi a ngaihpawimawh em avang leh zirna lama nasa taka hma a lak vang a ni tiin, Thingsai chu Mizorama High School nei hmasa pangana hial a ni thei a ni a ti.
Justice Michael chuan Thingsai mi hmasaten Thingsai chu raltiang ram ni turin hma an lo hruai tawh a, he meichher hi Thingsai khaw thangtharten an chhawm nun zel a ngai a ni tiin, Thingsai khua in zirna kawnga hma a sawn theihn tura a pu, Pu Lena inpekna te Thingsai khaw mipuiten an ngaihhlut sak avangin lawmthu a sawi bawk. Justice Michael chuan tunlaiah thangthar zingah thatchhe tawk leka lehkhathiam an tam niin mithenkhatten an sawi thin tiin hetiang lak atanga thalaite chu fihlim a, lehkhathiam mitaima ruihtheih thil laka fihlim nih tuma inbuatsaih a hun tawh a ni, a ti bawk.
Saikhawpui Kutah hian Kut Pa bakah, Pi Vanlaldiki Sailo, Chairman PwD, Er. Lalrinkima Hnamte,Engineer in Chief PWD leh Pu Liankima Lailung, IFS, Chairman Mizoram Pollution Control Board te chuan khuallian niin an telpui a, Mizoram hmun hrang hrang atangin Thingsai khawchhuak mi thahnem tak telin thusawi chi hrang hrang leh hnam lam leh zai hmangin hun an hmanga Kut ruai khawtlangin an kilho a ni.
Kut report a tarlan danin tun dinhmunah Thingsai khuaah hian chhungkaw 621 awmin mihring 3,250 an awm mek a ni.
