Home Minister–in Central YMA Executive Committee meeting 2024-a a vawi khatna a hmanpui
09 Jan 2024: Home Minister Pu K.Sapdanga chuan nizan khan Central YMA Executive Committee meeting 2024-a a vawi khatna chu CYMA Committee Room-ah a hmanpui.
Minister chuan YMA chu khawtlang muanawm leh him a awm theihna tura sawrkar tha tichaktu, kut ke tangkai a lo ni tawh thin a, chutiang ni chhunzawm zel tur chuan a duh thu a sawi a, hun kal tawh thlirin, hna khirhkhan zual han thawh tak tak chuan sawrkar tuan an duhkhawp lo fo thin a, sawrkar lam pawhin YMA te hmathehin, eng emaw chang phei chuan an papek hial a, dan leh hrai kenkawh lamah phei chuan YMA ten legal sanction an neih bawk si loh avangin, khawtlang tana tlawmngaia thawktute zawk hi mipui dem an hlawh lek lek thin a ti a, a thawkchhuaka te hah zia leh inpekna san thin zia hrechiangtu tan rilru natna tam tak a awm thin tih a sawi.
Minister chuan sawrkara mawhphurhna a chan chhung chuan mipuiin dan leh hrai kenkawh kawnga sawrkar an rin ngam lehzual theihna tura thawh a duh a ti a, an hmachhawp te ti hlawhtling turin YMA tawiawmna leh finchhuahna an mamawh tih a sawi a, mipuite leh tlawmngai pawl te chu sawrkar tha tak an siam theih nan thawhho puiah a sawm bawk.
Nizana hun hman hi Central YMA President Pu Lalhmachhuana chuan kaihruaiin, Pu RL. Zomawia, CEC chuan hunserh a hmang a. Pu R. Lalngheta, Ex-President chuan Central YMA hmingin Pu K Sapdanga, Home Minister hi Mizo Ipte chei a hlan bawk. (AIR)
