15 Jan 2024: Lunglei District Congress Committee (LDCC) chuan kum 2024 atana an Party Office, Congress Bhavan hawnna inkhawm vawiin chhun dar 12:00 khan an Party Office ah an hmang.
Kumthar atana Party office hawnna inkhawm hi LDCC President Pu K.L.Chhawnzauva’n a kaihruaia Pi R.Lalhmangaihzuali, LDCC General Secretary-in Pathian hnena inhlanna hun a hmang a ni.
He huna thusawitu Pu Zodintluanga Ex- MLA chuan tunhma khan Mizoramah Political Party lian pahnih chauh kan awm avangin kum 10 hnuah sawrkar a inthlak tlangpui zela tunah erawh chuan ZPM Party a lo awm ve tak avangin Party pathum lian tak tak innekna karah chuan Party mala kum 10 sawrkarna siam hi a harsa tawh dawn tiin, ZPM Party mi leh sa chu an tam hrim hrim vang nilo in sawrkar thlak duh hrim hrim neutral vote an hmuh tam vang a ni a ti a, a thlang tlingtute ngei hian an la ning dawn a ni a ti. Kalphung thar an ti a, thlakhat vel lek hnuah MLA hamthatna hrang hrang an ti sang nghala, a ki an la sang hle a, an hmabak hi a hautak dawn hle a ni Pu Zodintluanga chuan tiin ZPM sawrkar hi kumkhat a ral meuh chuan an mahni vote tlingtute hian an beidawn pui dawn a ni a ti a, mipuiten beiseina sang taka an thlirna hi reiloteah a ral dawn a ti.
Pu Zodintluanga chuan inthlanpui neihzawh takah khan Congress Party mi leh sa kan la tam hle tih kan vote hmuh atangin a hriat a ti a, neutral-ten kan lam an hawi leh theihna turin Party mi leh sa te kan insiamthat angai tiin, MNF sawrkar kalta chu an thil tihsual a la lang zel dawn a, chuvangin ZPM sawrkar thlak turin Congress lo chu an awm lo a ti.
He huna thusawitu dang Pu P.C. Lalthanliana Ex-Minister pawhin Lunglei West biala INC Candidate ni a, hnehna a chan zawhloh chungchangah tumah mawhpuh tur an awm lo tiin keima mawh a ni a ti a, hetihlai hian theihtawp chhuahpuitu leh amah lo duhsaktu zawng zawngte hnenah lawmthu a sawi bawk. Pu Mathana chuan hmalam hun lo kal zel turah thawhhona tha nen theihtawp chhuah a pawimawh thu a sawi a, LDCC hruaitute chu an aia tha an awm chuanglo tiin Party mi leh sa ten theihtawpa kan tawiawm phawt chuan kan sawrkar leh ang tiin Party tan chuan a tul hunah midang ken thiam a, a tul hunah penchhuah ngam angai a ti.
Pu Eric Zomuanpuia Special Invitee MPCC pawhin kumthar Office hawnna inkhawmah hian thu sawiin, mipuite rintlak sawrkar leh tlak ni turin Congress Party chu ram neitu rilru pu tlatin Opposition Party tha tak nih kan tum angai a ti a. Congress Party chu mite banphak mai nilo thlenchilh thin kan ni tih hre rengin midangte tana Pathian malsawmna kaltlang theihna ni turin kan hmalam hun atan inbuatsaih zel ang u a ti bawk.
He hunah hian LDCC President hlui Pu C.Lalhmingliana pawhin thu sawina huntawi hmangin Lungleia Political Party dangte aiin LDCC hotute hi an tha zawk a ni a ti a, Party mipuite nen thawhhona tha tak kan neih zel chuan kan tho leh ngei ang tiin kumthar a nih anga rilru thar pu turin Party mipuite a sawm a ni.
