NIT Campus Lengpui atana sum sen ral tawh atangin a thlen chinte inmil lo ni a hriat a ni
19 Jan 2024: Higher & Technical Education (H&TE) Minister Dr. Vanlalthlana chuan vawiin chawhma khan Lengpui rama National Institute of Technology (NIT) Campus tlawhin hmalakna leh hmachhawpte a enfiah.
Dr. Vanlalthlana chuan National Institute of Technology (NIT) dangte ang bawkin changtlung taka NIT Mizoram kalpui chu sawrkar leh mipuite duhdan a nih thu sawiin, ram tana rohlu tak ni tura ngaih NIT Campus Lengpui buatsaih kawnga tun thlenga hmalak tawh chin chu lungawi thlak loh a tih thu leh sum sen ral tawh leh hmalakna inmil lo chu ngaihmawhawm a tih thu a sawi a. NIT chu Mizoram mai ni lo India ram tana zirna in pawimawh leh thalaite tana thiamthil zirna kawnga hmun pawimawh tak a nih avangin tihhmasawn kawngah theihtawp chhuaha tanlak tlan a ngai a ni, a ti a. Zau zawka inrawnkhawmna neih hnuah a tul angte sawrkar laipui hnena thlen thuai a tum thu a sawi bawk.
He hunah hian NIT Mizoram aiawhin Prof. Ajmal Koya, Registrar leh thawktu dangte’n Minister hi lo dawngsawngin hmalak tawh chinte an lo hrilh a. Contractor IRCON kaltlangin a hungna siam, PCC flooring, Internal Road, Electric pawh luhna leh a hmun siam rem (leveling) thawh a nih thu an sawi bawk.
Hmalaknate enfiahna atanga a lan danin sum sen ral tawh atanga thlen chinte inmil lo ni a hriat a ni a. NIT hotute chu Campus chhunga hmalakna leh hmanrua reng reng neitu thinlung pu chunga enkawl tura chah an ni a. Ram tana chhawrnahawm tak tur NIT Mizoramin a nihna ang tur tak a thlen theih nana hmalak leh bawhzui tulte pawh ngaihtuahho a ni a. Heng bakah hian Riverine Forest Reserve huamchhunga awm a nih avanga Dan anga chak zawka hmalak tulte pawh sawiho a ni.
Minister Dr. Vanlalthlana hi Higher & Technical Education Department atangin Principal Secretary Pi Esther Lalruatkimi, IRS, Director Pi Sangchhin Chinzah, IAS leh Official dangte, Mamit DFO Pu C. Lalrinmuana leh Line Department Official dangte’n an tawiawm a ni.
