NGO hrang hrang aiawhte’n District Court Lunglei building sakna atan PWD SE Quarters awmna hmun an duh
19 Jan 2024: Vawiin chawhnu khan Pu Vanlalenmawia, District & Sessions Judge, Lunglei District Court kaihhruaiin a office chamber-ah Lunglei khawpui chhunga NGO hrang hrangte’n Lunglei District Court hmunhma neih dan tur an sawiho.
Meeting kaihruaitu Pu Vanlalenmawia chuan district hrang hranga District Court hmunhma leh building te projector hmanga entirin, project cost hrang hrangte a sawifiah a. Mizoram Judiciary inrelbawlnaah hian Judicial District pathum– Aizawl, Lunglei leh Champhai Judicial District te-a then a nih thu sawiin; Lunglei Judicial District-ah hian Lunglei, Siaha, Lawngtlai leh Hnahthial te awmin; District & Session-a Judge Lunglei chu a enkawltu a ni a; Lunglei District chiah hi hmunhma tha la neilo leh project pawh la siam hleihtheih loh a nih thu a sawi. District thar Champhai District pawhin hmunhma tha tak a neih avangin Rs vbch 49 chuangin project a kal mek a, sak thuai a nih dawn thu sawiin, District Court building sakna tur hi Centrally Sponsored Scheme for Development of Judicial Infrastructure atanga lokal a nih thu leh scheme hi kum 2026-a tawp mai tur a nih avanga a tawp hma ngeia sawrkar laipui zêm zen ve hman nih a ngai thu leh Lunglei mai bakah chhimbial mipuite tana pan nahawm leh chhenfâkawm hmunhma \ha neih a nih ngei theih nana hmalakpui turin NGO aiawhte a sawm a ni.
NGO aiawh kalkhawmte chuan an ngaihdan leh rawtna an neih te an sawi a; tun thlenga District Court Lunglei-in hmunhma a la nei lo pawi an tih thu sawiin, 15th Finance Commission-in Centrally Sponsored Scheme hnuaia Court building sakna atana sum a ruahmante hman tangkai a nih ve theih nan leh mipui tana pan nahawm leh hmun laili-ah District Court building sak thuai a nih theih nan Sawrkarin chak takin hma la se kan ti a, tuna PWD SE Quarters hi District Court Lunglei building sakna atan Sawrkar-in felfai taka hma a la a nih chuan kalkhawmte hian dodalna an neih loh tur thu resolution siamin an pass a ni.
Resolution-ah hian Pu Vanlalenmawia, District & Sessions Judge bakah YMA Sub-Hqrs Lunglei, MHIP Sub-Hqrs Lunglei, MUP Gen-Hqrs Lunglei, Chhimbial Chhantu leh Lunglei Thalai Pawl te-a an President theuhte’n hming an ziak a ni.
