24 Jan 2024: Mizoram Polytechnic Lungleiin tui hman tur hnianghnar zawk a neih theihna turin PHE Department Lunglei chuan tui litre Nuai 10 dah theihna tur tuizem siam hna ngawrh takin a kalpui mek.
Mizoram Polytechnic Lunglei hmuna tuizem (Roof top Rain Water Harvesting) siam hna hi Amrut-2 atangin PHE department kaltlangin Wetcomb Company-te’n an thawk mek a ni.
Tun dinhmunah tuizem pakhat siam zawh tawh niin, tukin khan Er.Lalropuia Hmar E.E, LWSM leh a thawhpuite chuan hna kal mekte an enfiah a. Kumin fur ruahtui tlak huna a taka hman tangkai hman tura tuizemte chu siam zawh hman ngei an duhthu hnathawktute an hrilh a ni.
Mizoram Polytechnic Lunglei Complex, Hrangchalkawn-ah hian Hostel naupang leh thawktu dang mi 300 chuang hlek an khawsa a, kumkhatah tui lei nan Rs nuai 13 bawr vel an seng thin tih sawiin, tui hnianghnar zawk an neih theihna tura PHE Department Lungleia thawktuten ruahmanna an siam sak chu lawmawm an tih thu an sawi a ni.
