24 Jan 2024: Myanmar Sipai thlawhna nimina Lengpui thlawhna tumhmuna a chetsual avanga an sipai hruai haw tak loh te chu vawiin khan thlawhna dang hmangin hruai haw an ni a, an vaiin mi 93 an ni a, nimina thlawhtheihnaa chuang mi 14 te pawh hruai haw nghal an ni.
Vawiin khan Lengpui Airport pawh dan pangngaiin hawn leh nghal a ni a, thlawhna lut leh chhuak pawh dan pangngaiin kalpui zui nghal a ni.
Myanmar sipai thlawhna hi Mizorama an ram sipai rawn tlanchhia te phur let tura rawn kal a ni a. Nimin chawhma dar 10:20 vel khan Lengpui Airport-ah tumin, a tum hnua a tlan zui chu kawngsirah a kawi thut a, hetianga a chetsual chhan hi hriat a la ni rih lo a ni.
Kar kalta Nilaini khan Lawngtlai district-a Bandukbanga khua a Myanmar sipai 276, an ralthuam nen an lo lut a, Home department atanga thudawn danin Myanmar sipaite hi Arakan Army hel pawlin an awmna camp an laksak avangin Nilaini khan Bandukbanga, a thenin Bondukbangsora ti a an sawi bawkah an rawn lut a. Assam Rifles hovin lo buaipuiin a then chu Parva lamah an hruai a, an tam tham deuh avangin a then chu Zorinpui lamah an hruai bawk.
Ningani khan Myanmar sipai 200-te chu Lawngtlai kaltlangin Lunglei-ah Assam Rifles truck hmanga phurh phei an ni a, Lunglei-a zan khat an riah hnu-ah a then chu Zirtawpni khan Aizawl panpui an ni a, Inrinni khan Zorinpui amite zawng zawng nen Aizawl thlenpuiin Zokhawsang a Assam Rifles hmun thlenpui an ni a, a thawh khatna atan thawhtanni khan sipai 184 te chu Myanmar Rakine State ah lak an ni tawh a, an la lak loh mi 93 te rawn lam tura kal thlawhna hi a chesual ta a ni.
Hemi hma, nikum November thla khan Myanmar sipai 104 lo lutte chu Indian Air Force helicopter hmangin Manipur-a Moreh hmunah dah a, an rama hruai luh an lo ni tawh a. Kumin January ni 2 khan Myanmar sipai 151 chu Myanmar air force cargo thlawhna hmangin Lengpui ataning Sittwe-a dah an ni a, January ni 9 khan sipai dang 104 te chu Lengpui atangin Sittwe-ah tho Myanmar sipai cargo thlawhna-in dah chhoh an ni tawh bawk a ni. (AIR)
