Gov’t J.Buana College (GJBC) Youth Adventure Club leh NSS tangkawp chuan January 24 – 27 khan Saibu, Chhimtuipui-ah White Watermanship Training Course hlawhtling takin an buatsaih a. Zirlai 27 leh thawktu pahnih an kal a ni. He hunah hian white water swimming (suar leh tuiluang pangngaia tui hleuh dan), suar-a chetsual palha inhumhim dan, ramhnuaia damkhawchhuah dan (jungle survival skills) zirin; training chi hrang hrang an nei.
Tuna White Watermanship Training Course hi GJBC hian vawi 3 an buatsaihna a ni a, kum hmasa lamah te pawh Saibu leh Zanghmisuar-ah training course hi an lo buatsaih tawh thin a ni. Chhimtuipui White Water Rafting Expedition bakah Tuipui ‘D’ atanga Kawlchaw thlengin Water Rafting Expedition te pawh an lo buatsaih tawh a. GJBC hian Chhimtuipui lui luan dan leh sea level atanga a sàn zawng te pawh zirchiangin an lo zawhchhuak tawh a ni.
GJBC hi tun dinhmunah Mizoram-a college hrang hrangte zingah rafting training leh white watermanship training course buatsaih thei awmchhun an ni a. College-te zingah rafting boat, life jacket leh water gear chi hrang hrang nei awmchhun an ni bawk.
GJBC hnuaiah hetiang training course hi zirlai 120 velin an lo train chhuak tawh a ni.
