Committee on Myanmar Refugees-in Raltlanten bawrhsap pisa atangin ID la chhuak vek se an duh
Siaha district-a Lopu leh Lomasu Raltlan camp a awmte’n tun hnaiah ei leh barah harsatna an tawk tan a, district thuneitute chuan sorkar hotute hnenah an thlen tawh ni a thudawn a ni.
Tunhnai-a Siaha District Level Committee on Myanmar refugees thukhawm chuan Myanmar lam atangin raltlan lo luhbelh thei reng dinhmunah Siaha District-a awm avangin, lo inralrin lawk ni se an ti a, Raltlan Camp-a medical lamten clinic an neih thin chu a tul ang zelin chhunzawm ni se an ti bawk.
Raltlan lo lut tharte zingah Registration mumal taka ti an awm lo tih chu committee hian pawmin, chak zawka hmalak a tul an ti a. Raltlanten bawrhsap pisa atangin ID la chhuak vek tawh se an duh tih sawiin, ID neilote chu man chhuah zung zung nise an ti a. Ramri a khaw awmte an tangkai hle tih sawiin, Village Level Committee-te chu uluk leh chak zawka hma la tura ngei nise an ti a. Tuna Raltlan lo awm nghet tawhte zingah pawh ID neilo an awm em tih dap chhuah nise an ti a ni. Raltlante dinhmun an hriatthiampui hle tih pawh sawiin chutih laiin a ram leilung fate himna chu thil pawimawh hmasa a ni an ti a. Raltlan leh ram leilung fate himna pek chu District Level Committee on Myanmar Refugees thiltum ber a ni, an ti.
Siaha district bawrhsap, District Level Committee on Myanmar Refugees chairman ni bawk Pu Lalhmunsanga Hnamte chuan Siaha District chu Myanmar nen a ramri nei anih avangin raltlan tan pan remchang ber pakhat a ni a, ramri pela lo lut pawh an tam hle a ni, a ti a. Duh vang ni lovin loh theih lohna vang zawkin raltlante an lo lut thin tih sawiin, mumal leh felfai zawka enkawl an nih theih nan District Level Committee on Myanmar Refugees chu din a ni, a ti. Raltlante lo enkawl kawnga theihtawp chhuah thintu Tlawmngai pawl, Kohhran leh mimalte chungah lawmthu a sawi a. Raltan lo lut an pun belh ve zel avangin leh ram mipuite him zawk nan uluk leh awmzia nei zawk a hmalak a tul hle tih sawiin, Siaha District a lo him a, a ralmuan zel theih nan hmalak chhunzawm zel a ni a ti. (AIR)
