Aizawl February 5, 2024 : Kum 2012-a All India Radio, Aizawl Station-a hna siam chawp hmanga sum Rs Nuai 8 chuang tihchingpen thubuaiah thawktu mi 3-te chu kum 2 atanga kum 4 lung in tang tur leh pawisa chawi turin court-in a hrem.
Special Judge, Prevention of Corruption Act, Mizoram chuan kar hmasa Zirtawpni khan AIR Aizawl a thawk mi 3 te thiam loh a chantir hnuah vawiin khan hremna a puang a, Pu Zosangzuala chu kum 4 lung in tang tur leh Rs Nuai 6 chawi tura hrem a ni a, Pi Lalnunziri chu kum 2 lung in tang tur leh Rs Nuai 6 chawi tura tih niin Pi Judy H Lalmuanpuii chu kum 2 lung in tang tur leh Rs Nuai 6 lakh chawi tura tih a ni bawk.
Court tarlan dan chuan, January 2012 atanga June 2012 inkar chhung khan, khatih hun laia All India Radio, Aizawl Station-a Asst. Director Pu Zosangzuala te, Programmme Executive Pi Lalnunziri te leh LDC Pi Judy H. Lalmuanpuii te chuan All India Radio, Aizawl Station-a thawk tur angin a tak awm silo in Casual Production Assistants 20 chhawr anga ziak felin, hemi atana sawrkar pawisa kal ral chu Rs 2,60,444/- a chhut a ni a, hei bakah hian a tak awm silo in Music Artiste 39 te hla record anga tarlangin, heta sum kalral hi Rs 6,08,916/- a nih thu a tarlang bawk a, CBI-in he thubuai hi court-a a finfiah hnuah thiam loh chantir an nih thu hi puan a ni ta a ni. (ddnewsmizoram)
