05 Feb 2024: Vawiin chawhnu dar 2:00 khan District and Sessions Judge Lunglei office chamber-ah Pu Vanlalenmawia, District and Sessions Judge, Lunglei leh District Legal Services Authority (DLSA) Chairman ni bawk kaihhruainain Under Trial Review Meeting neih a ni.
Vawiin thutkhawmah hian District Jail-a tang mek thubuai la chin fel loh te chungchang ngaihtuah a ni a. Heng thubuai la ngaihtuah lai mekte zingah hian bail-a chhuah theih tur mi 10 thlanchhuah zingah mi 2 bail-a chhuak thei tura thlan an ni. Hei bakah hian a vawi khatna atana dan bawhchhia (first time offender)-te ngaihhnathiam theihna dan Probation of Offenders Act 1958 hmanga chhuah turin mi 2 thlan an ni.
Vawiin meeting-ah hian Under Trial Review Committee member Pi Lalthansiami Hnamte, Chief Judicial Magistrate, Lunglei leh Secretary District Legal Services Authority ni bawk te, Pu Rahul Alwal, Superintendent of Police, Lunglei leh Jail Superintendent Pu K.Lalhlimpuia SDC, Lungleite an tel a, Committee member zinga pakhat District Magistrate Pi Ramdinliani chu Aizawl-ah Election training a neih mek avangin a aiawhin Pi Lalhlimpuii SDO (Sadar) a tel a ni. Under Trial Review Committee member-te bakah a bika sawmte Pu F.Rohlupuia, Additional District and Sessions Judge, Lunglei leh Pu Malsawmdawngliana, Public Prosecutor, Lunglei te an tel bawk. He meeting-ah hian a kaihruaitu Pu Vanlalenmawia, District and Sessions Judge chuan Jail Visiting Board-ten Jail an tlawh hun tur atan February 14 a ruat a ni.
Under Trial Review Committee hi Supreme Court in Writ Petition No.406/2013 Re-inhuman Conditions -1382 Prisons a din tura a tih behchhana din niin, Jail a mihring tang tam lutuk (over population) venna atana din a ni. Tun dinhmunah District Jail Lunglei-ah hian tang 153 an awm mek a, Jail capacity hi 109 niin, Jail capacity aiin mihring 44 zetin tang an tam a ni.
