06 Feb 2024: Vawiin chawhma dar 10:00 khan 2nd Bn MAP Hqrs.Luangmual,Lungleiah kar hnih awh tur “Training for Mizoram State Disaster Response Force” hawnna inkhawm tawi neih a ni a. He hun hi Pu PC Lalchunglura, Jt. Director(Ops), DM&R chuan kaihruaiin, Pu C.Lalthanmawia IPS,DIG(SR), Lunglei chuan khuallian niin a hmanpui a, Training hawnna thuchah a sawi bawk.
Khuallian Pu C.Lalthanmawia chuan 2nd Bn MAP Hqrs-a hetiang training pawimawh tak DM& R Dept. leh 2nd Bn MAP Hqrs tangkawpten an buatsaih chu lawmawm a tih thu sawiin, Trainee-te chu khuarel chhiatna lo thlen palha chhanchhuahna leh chhandamna hna thawktu tur an nih avangin he kar hnih chhung an training-ah hian thiamna tak tak pawhchhuak ngei tur leh rilru pe tak leh thahnem ngai taka training turin a chah hlawm a, bel taka an Training course te an zawh theuh theih nan duhsakna a hlan bawk a ni.
Pu Francis Lalnuntluanga Ralte, Commandant, 2nd Bn MAP Hqrs pawhin, 2nd Bn. MAP Hqrs. chhunga SDRF hmanrua neih ang ang te an endik a, siamthat ngai leh thawmthat ngaite chu siamthat vek a ni a. Nikum Furpui chhung zawng pawh khan Quick Response Force (QRF) atan company khat chu inralringa dah reng an nih thu a sawi. Kum 2021 April thlaa Lungleia kangmei chhuakah pawh khan 2nd Bn MAP Hqrs-a SDRF-te an thawh hlawk hle thu a tarlang bawk. Tunah hian Mizoram Armed Police zingah SDRF Training tawh mi 459 an awm mek a, 2nd Bn MAP Hqrs. hnuaiah hian 100 chuang an awm mek thu tarlan a ni bawk.
Dr.Lalrokima Chenkual, Deputy Director(Trg), DM&R-in Training Course leh Training kalpui dan tur tlangpui sawihawnna hun a hmang a. Pu Kaste Romalsawma, Asst. Director (Ops), DM& R-in lawmthu sawiin Training hawnna inkhawm tawi chu tihtawp a ni.
