06 Feb 2024: Vawiin khan Chief Minister Pu Lalduhoma chuan Silk Samagra-2 hmanga Mizorama Sericulture hmalakna thar project pathum; Rs. Nuai 624.47 senna tur Eri Project- Lai Autonomous District chhunga chhungkaw za thlan chhuahte nena kalpui tur, Rs. Nuai 588.36 senna tur Mulberry Project- Chakma Autonomous District Council a chhungkaw za thlan chhuahte hmanga kalpui tur leh Rs. Nuai 1339.61 senna tur Muga Project, Mizoram pum huapa chhungkaw zanga thlan chhuahte nena kalpui tur chu Thenzawl Golf Course Auditorium-ah a hawng. A hawnna inkhawmah hian Pu Lalthansanga, Sericulture Minister chu khualzahawm a ni.
Thusawiin Chief Minister chuan, khawvel pumah Muga Silkworm hi India ramah chauh a vulh theih a, India ramah pawh NE Indiaah chauh a kalpui theih a ni, a ti a. Assam hian an thar tha thin a, mahse nipui laiin Assam pawh a lum tawh lutuka tlangram an rawn melh tan a, Mizoram hi a tha em em tih finfiah tawh a ni, a ti.
CM Pu Lalduhoma chuan, project pathum kan hawnte hi farmer 700 huam tur hmalakna a ni a, a dawngtu tur thlan kawngah ruling party mi leh sa an nih avanga duhsak bik neihte a rem kan ti lova, Sawrkar tharah chuan mipui sawrkar kan nih ang ngeiin, tute emaw duhsak nana hmang lovin a hlawhtling ngei turte thlan kan tum tur a ni, tiin a beneficiary thlan thuah thawktute chu dik taka kal turin a chah a ni. Tunah hian khaw 200 chuangah chhungkaw 4000 aia tamten pangang an vulh mek a, an tharchhuah hralhna rate hi sawrkar chuan tihsan a tum a ni, a ti bawk. Muga P3 Unit Mizorama an dah dawn avangin Central Silk Board chungah lawmthu a sawi a, Joint Coordination Committee tel tura NE states atanga lokal Sericulture officialte chungah lawmthu a sawi.
Khualzahawm Pu Lalthansanga, Minister, Sericulture Department pawhin thusawiin, Project thar pathum te hian nasa takin Mizoram cocoon tharchhuah a tipung dawn a, a vulhtute bakah a kaihhnawih eizawnna kawng tam tak a siam bawk dawn a ni, a ti. He hunah hian Pangang vulha eizawngtute, Central Silk Board member leh scientist te, NE states hrang hranga Sericulture Director leh official pawimawh te, Serchhip district chanchinbumite an tel a ni.
