10 Feb 2024: Vawiin khan Chief Minister Pu Lalduhoma chuan Dr. Bhagwad Karad, Union Minister of State, Ministry of Finance, chu a chenna inah kawm a. Mizoram mamawh thil pawimawh tak takte a sawipui.
Chief Minister chuan, Mizorama bank tam zawkten Credit Deposit Ratio an nei hniam hlawm hle a, mahni target tlin thei lo an tam hle tih hrilhin, mipuite pawisa tling khawm hi mipuite tan veka CD Ratio tha zawk an beisei tlat tih hrilhin Union Minister hmalakpuina hi a ngen a. Mizoram sawrkar pawhin bank ten an hnena loan diltute an rin ngam a, uar lehzuala loan an pek theih nan party mi leh sa duhsak tura ngenna emaw beneficiary atana lo thlan bik ang chi te an kalpui ve loh tur thu a hrilh a ni. Heng te bakah hian Mizoram Development Bank din theih dan tur te pawh a sawipui a ni.
Chief Minister chuan, central sawrkarin Interim Budget atanga a lan dana SASCI atan sum tam zawk ruahman a tum chu lawmawm a tih thu a hrilh a. Mizoram tana a kalpui dan awlsam zawk (special dispensation) awm thei se a duh thu a thlen a. 16th Finance Commission funding dan turah pawh, chhiah lakkhawm tur (revenue mobilise) nei tam lo tak a nih avangin Mizoram chu special category state a la dah chhunzawm zel turin a ngen.
Mizoram Rural Bank chu Mizorama bank inzarpharh zau ber leh mipuite pawhin an chhawr nasat a ni a, an CD Ratio pawh a tha thin hle a. Chuvang chuan thawktute allowances hi a sponsor bank, SBI-a thawktute allowances zat pek ve ni se tha a tih thu a thlen bawk.
Dr. Bhagwad Karad hian Chief Minister thil thlen te chu an pawimawh hlawm hle tih sawiin, Chief Minister awm lai ngei hian a kaihhnawih official pawimawh te telna tur meeting tun thla ni 16 a nei tura kohna a tichhuak nghal a ni.
