13 Feb 2024: Vawiin zinglam Dar 8:30 khan MZP Sub Hqrs, Tlabung chuan Tlabung Bazar-ah Tlabung Higher Secondary School (Science Stream) Samagra-a Chemistry Lecturer Sawrkarin an transfer-na order an cancel leh avangin lungawi lohna an lantir.
He hun hi Lallawmawma Pachuau, President MZP Sub Hqrs Tlabungin a kaihruai a, Lalpeksanga Chenkual, President MZP Hqrs Lungleiin thu a sawi.
MZP Hqrs Lunglei President chuan MZP chu Zirlai pawl a nih angin, Zirlaite harsatnaah theihtawp a chhuahpui thin a, Tlabung Higher Secondary School-a Chemistry Zirtirtu Tlabung a post lai reng hmundangah(attach) chhawr a ni reng chu Tlabung khawtlang mipuite zahlohna anih thu sawiin, Sawrkawr paw’n ngai pawimawh a rawn dah let ngei turin an phut tlat thu a sawi.
Chemistry Zirtirtu an neih loh avangin Zirlaiten harsatna an tawk nasa em em a, Board Exam hmachhawn mai tur an nih avangin Zirlaite an mangang hle a. Zirlaite harsatna hria Chemistry Zirtirtu kan neih sa hi rawn dah let ngei turin MZP chuan Mizoram Sawrkar a ngen a ni, a ti a. Vawiin a hmalaknain awmzia a neih loh chuan MZP chuan a tawp thlengin hma a lak chhunzawm zel dawn thu, MZP Hqrs Lunglei President chuan a sawi bawk.
Transfer order Sawrkar-in a cancel lehna copy chu an hal zui a ni.
MZP chuan Ni 15 chhung Sawrkar ngaihchan nise, chumi hnuah engmah thu thar a awm loh chuan a ai na zawkin Chemistry zirtirtu an neih theih nan hma an lak chhunzawm dawn thu sawi a ni bawk. He hun hi MZP Hqrs Lunglei aṭangin President, Treasurer leh Secy i/c Activities-te’n an hman pui a ni.
