CM leh NGO hruaitute’n ramri hung leh Free Movement Regime chungchang an sawiho
17 Feb 2024: Vawiin khan Chief Minister Pu Lalduhoma chuan CM Meeting Room-ah NGO Coordination Committee hruaitute a kawm a. Myanmar border fencing, Free Movement Regime leh thil pawimawh dangte an sawiho.
Chief Minister chuan, kan hriat angin kan sawrkar chuan Myanmar ramri hung hi tha kan ti lova, free movement regime te pawh tha takin awm reng se kan duh. Tuna kan ramri hi British sawrkarin divide and rule policy hmanga min barhluih ramri a ni a. Unau min thenhranga kan hnam lian tak min pawtdarh a, pawm theih a ni lova kan hmathlir leh duhaisam chu rorelna pakhat hnuaia awm hi a ni reng zawk, a ti. Tun hnaiah Delhi-ah tum hnih ka zu zin a, Union Home Minister ka hmu ve ve a, Minister pawimawh dangte pawh ka hmu a, an hnenah kan dinhmun hi ka hrilh a. Tuna Myanmar ram dinhmun te hrilhin Manipur lam hi in lo hung anih chuan kan sawi phak a ni lova, Mizoram erawh chu hung a rem lo a ni, tiin ka thlen a. Min lo dawnsawn dan te ka ngaihtuahin thlamuang takin kan awm thei niah ka ngai, tiin hma a lak dan tlangpui a hrilh a. Sawrkar anga hmalakna te, NGO anga hmalakna te kan nei ang a, kan tih tlan zel hi a tha. Free Movement chungchang bik hi chu ralthuam leh ruihhlo tawlhrukna a tam em avang hi ni mah zawktein a lang a. Hemi thuah pawh hian kan border security infrastructure te tihhmasawn hmasak a tul thute pawh ka thlen a ni, a ti.
NGO Coordination Chairman Pu Lalhmachhuana chuan, sawrkar tharah a tha zawnga thil inthlak an hmuh chhoh zel avangin lawmthu a hrilh a. NGO ten border fencing an duh lohna te, FMR hlih an duh lohna te tilang tura punkhawm huaihawt an tum dan te, chutiang lam ngaihtuaha an thawhpui Nagaland lama NGO te pawhin hma an lak ve mek thu leh palai an tirh thute hrilhin, an thil phutte chu central sawrkar leh Mizoram sawrkar hnena ziaka an thlen tawh thute an sawi a ni.
Heng bakah hian Bangladesh lama zohnahthlakte harsatna tawh mek te, Manipur lam atanga raltlan chungchang te pawh an sawiho a ni.
