28 Feb 2024: Power and Electricity Minister Pu F. Rodingliana chuan Mizoramah tuitha (hydel power) hmang power project 15 awmin chuta tang chuan kawlphetha megawatt 38 point 55 pekchhuah a ni a ti.
MNF member Pu Ramthanmawia zawhna Assembly inkhawmah chhangin Minister chuan hydro electric power project tam zawk hmanga kawlphetha siamchhuah tihpun tum a nih thu a sawi a. Lungleng bula megawatt 120 siamchhuahna tur Tlawng Hydro Electric Power project chu survey zo fel tawhin kumin chhungin DPR peihfel tum a ni a ti a. Megawatt 150 siamchhuak thei Ngopa bula Tuivai Hydro Electric Power project leh Sesawng bula megawatt 24 siamchhuak thei tur Tuirini small hydro electric project te chu DPR siam peih tawh a ni, a ti.
Nitha (solar) hmangin kawlphetha megawatt 45 siamchhuak thei tur hmun hrang hrangah siam mek a nih thu a sawi a. Tun dinhmunah kan hman tam lai berin kawlphetha megawatt 156 hman thin a nih thu a sawi bawk.
