Ramri hung a duh lohzia a lan tir thin thu Pu K.Vanlalvena MP (Rajya Sabha) chuan a sawi
29 Feb 2024: Nimin chhun khan Rajya Sabha MP Pu K.Vanlalvena chuan Mizo hnam run, Lunglei tlawhin party worker-te hmaah thu a sawi a, “Sawrkar term liam taa kan hotuten kan hnam an humhalh that dan chu a lungawithlak hle a ni” a ti.
Pu K.Vena chuan term liam taa MNF sawrkar khan Mizo hnam hi nasa taka thain a hung a ni tih sawiin, ramri hung chungchangah tuna Mizoram CM chu a huaisen tawk lo niin a sawi a; “Ramri hung chu nasa taka ka duh lohzia ka lan tir thin avang hian India sawrkar hian a hung lo maithei bawk a ni” a ti.
Rajya Sabha MP chuan, term liam taa MNF sawrkar chu Assam ramri-a a huaisenzia te sawiin, “Myanmar, Bangladesh leh Manipur buainaa kan Zohnahthlak unau mangang te chhanhimna kawngah India sawrkar duh lo zawngin vawi tam tak kan awm a, MNF ten zalenna kan sual hun lai tih lohah chuan term liam taa kan ministry hun lai kha hnam thila kan la chet nasat ber tum a la ni. Kan hotuten hnam tana hna an thawh kha a lungawithlak takzet a ni” a ti.
Pu K.Vanlalvena chuan ZPM sawrkar chungchang sawiin, “OSD cheng khat hlawh leh Adviser to CM kan neih te nasa taka min sawiseltute khan tunah keini aiin an ngah ta zawk a, kan sum puk thin sawiseltuten hun reilote chhungin an puk hnem ve leh ta hle si a, hmunphiah leh sawhthing chungchanga ‘D-A-H’ tia an insawi ang an ni leh si lo nen, tunah chuan anmahni vote-tu tam takin an sawisel tan tawh a, fiamthu thawhna atana hmang pawh an awm tawh a ni.” a ti.
Pu K. Vanlalvena hian nimin chawhnu lamah Zorinpui tlawh turin Lunglei a chhuahsan a ni.
