05 March 2024: Kum 2024-2025 Mizoram Budget, a tlangpuia sawihona, vawiin Assembly thutkhawma neihah Chief Minister Pu Lalduhoma chuan, eptu Leader in ZPM kaihhruai sorkar chu Mizoram sorkar awm tawha leiba ngah ber nia a sawi chu chhangin, sorkar hmasa leiba Rs vbch 1.3 chuang an chhawm chu a chhan ber a nih thu a sawi a, leiba awm sa bakah tun sorkarin dan phal china sum puk tur a neih bawk si avangin leiba chu a pung lo thei lo a ni a ti.
Pu Lalduhoma chuan sorkar hmasain sum Rs vbch 3246.71 a puk laiin, tun sorkar chuan Rs vbch 1992.3 puk a tum a, hei hi sorkar hmasa sum puk aiin Rs vbch 1254.68 in a tlem zawk dawn a ti a, sum puk belh zela kal chu a him loh avangin tun sorkar kum chu sum dinhmun siam that nana hmangin sorkar a insum dawn a, mipuite hriatthiamna pawh an ngen a ti.
