March 7, 2024 : Lai Autonomous District Council a MNF Sorkar, Chief Executive Member Pu V. Zirsanga kaihhruai chu vawiinah thlawptu a neih dan fiahna, Floor test tura LADC Special Session koh ni mahse, CEM hian banna a thehluh avangin, Floor test nei lovin thutkhawm tihtawp a ni.
Elected Member 25 awmna LADC -ah hian MNF Legislature Party a MDC 9 leh anmahni thlawptu BJP, INC, ZPM leh Independent Member pakhat theuh, an vaiin MDC 13-te’n Larsap hnenah Pu V.Zirsanga chuan thlawptu a nei ngah tawk tawhlo tih an thlen hnuah, Larsap ruahmanna angin LADC Chairman Pu V.L.Hmuaka chuan Pu V.Zirsanga’n thlawptu a neih dan fiah turin LADC Special Session chu vawiin chawhma dar 10:30-ah tan turin a kova, Session tan hma chawhma dar 10:20 khan Pu V.Zirsanga chuan CEM atanga a banna LADC Chairman hnena a thehluh avangin LADC Special Session-ah hian floor test neih theih anih loh thu Chairman chuan sawiin, tiam chin awm lovin Session a titawp zui a ni.
LADC CEM nilai Pu V Zirsanga chu eiruk thubuaiah Special Court (Prevention of Corruption Act) chuan thiam loh a chantir hnuah High Court-ah zualkoin, court thuremna awmsa kalpui chhunzawm lo tura tih mek a ni. LADC a hruaitu hlun tak pakhatin kan palai a hrilh danin, CEM in banna a thehluh chuan, Sawrkar thar din tura inruahman dan pangngai anga kalpui tur anih thu a sawi a, thil awm dan tur sawi lawk vek hleih theih nilo mahse, tuna CEM bang ta leh a lamtangten MNF Legislature Party tho, midang kaihhruaina hnuaiah dinin, sawrkar siam turin hma an lak thuai a rinawm a ti a ni. (DD)
