15 March 2024: Vawiin chawhnu dar 2:00 khan Mizoram Sawrkara Home Minister Pu K.Sapdanga chuan Lunglei High Powered Committee Office tlawhin Lungleia Tlawmngaipawl hrang hrang aiawh, Sawrkar Official leh Media-te nen inkawmna hun an hmang.
Home Minister puala inkawmhona HPC Conference Hall-a neih hi Pu C.Vanlalmuana, Chief Planning Officer HPC-in kaihruaiin; HPC lo din chhoh dan leh a nihphungte a sawifiah. He hunah Pu K.Sapdanga Home Minister chuan Lunglei chu Developmental Structure pahnih High Powered Committee leh Lunglei Municipal Council-in a vil hi a vanneih thlakin a lawmawm hle a ni tiin High Powered Committee pawh hmasawn zel tur leh a tul anga ruahmanna tharte pawh siam a la ngai maithei a ni a ti.
Home Minister Pu Sapdanga chuan Lunglei chu ZPM Party tan bik phei chuan hmun pawimawh a ni tiin mipuiten LMC-ah mak za ah mark za min pek avangin Mizoram pumah ZPM thli a tleh phah a ni tiin; hetiang anih avang hian tun Sawrkarah hian hmasawnna nasa zawk pawh a hmuh ngei kan beisei a ni, a ti. Lungleia pawl hrang hrang leh Official ten an lo dawnsawn dan chu hahdam thlak a tih thu a sawi bawk.
He hunah hian HPC Vice Chairman Pu Malsawmtluanga Lunglei North bialtu MLA pawhin thu a sawi a, MLA pahnih Pu B. Lalramliana Lunglei South bialtu leh Pu Lalhlimpuia Lunglei West bialtu te pawh telin Home Minister hnenah hian YMA Sub Hqrs Lunglei hruaitute chuan raltlan chungchanga hmalak tul an tihna leh thil pawimawh dangte an thlen a ni.
