PHE Dept Lunglei chuan thâl laia Tlawng tui kâm avanga mipuite’n tui lama harsatna an tawh thin sutkian nan hmalakna ngawrh takin an kalpui mek.
PHE Dept Lunglei te hian Lunglei khawpui tui-a chawmtu Tlawng Luia tui an pump-na hmunah Impounding Dam siam hna ngawrh takin an kalpui mek a, tunlai hian Dam foundation investigation leh excavation tih mek niin, lui-a tiau leh lung awm te chu metre 3 vela thûk thleng haiin Excavator hmanga thiarchhuak turin hma an la mek a ni.
Ruahman ang chuan he Impounding Dam hi siam zawh a nih chuan tui litre maktaduai 200 aia tam a khuah tlin theih beisei a ni a. Tui tling hian thâl laia Lunglei khawpui mipuite tui lama an harsatna nasa taka a chhawk zangkhai theih dawn bakah ramngaw chereu tur ven leh tui-hna a tihpun theih an beisei tih PHE Dept Lunglei-a thawktute chuan an sawi a ni.
Impounding Dam siam mek hi AMRUT 2·0 Scheme atangin Rs nuai 477 sênga siam zawh tum a ni a, beisei anga hna a kal chak chuan kum khat chhunga peihfel hman tum a ni.
Tun dinhmunah Lunglei khawpui chawmtu tui laknaa tui khuahtlin chu a tam tawk loh avangin thâl laiin tui tam tawk pump khawl tur a awm thin lova, hei hian thâl khawro-ah Lunglei khawpui mipuite’n tui-a harsatna nasa tak an tawh phah thin niin thawktute chuan sawiin; tuna hna kal mek tui tam zawk khuahtlin theihna tur hi peih a nih hun chuan thâl tui tlem lai pawhin tui tam zawk pump tur a awm reng theih tawh dawn avangin harsatna nasa takin a sukiang dawn a ni, an ti.
