19 March 2024: Aizawl Municipal Council-in tun hnaia thawktu tur an lak mi 6-te chu MZP-in sut tura an ngen avangin nimin khan sûtna thupek an ti chhuak.
Aizawl Municipal Corporation (AMC) hnuaiah hian Geologist-3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak an ni a, an lak danah dan kalha thiltih a awm ngei niin MZP chuan ngaiin sût leh turin a ngen a, MZP chuan hna lak chu Dan angin Advertisment chhuah a nih loh bakah, State sawrkar phalna an lak hriat a ni lova, danin a sawi angin MPSC emaw MSSSB kaltlanga lak a ni lo tiin heng hnalak dan diklo chu March ni 15 ral hma ngeia sut turin AMC hotute a lo ngen tawh a ni.
MZP ngenna leh duhdan angin AMC Executive Council Meeting ni March ni 15-a thukhawm chuan, AMC hnuaia hnalak hrang hrangte a sut a, nimin khan sutna lehkha (order) hi tihchhuah a ni ta a ni. MZP thuchhuah chuan an ngenna ngaipawimawh a Aizawl Municipal Corporation (AMC) in, an hnuaia hna lak post 6 an cancel chu MZP chuan lawmawm a ti hle a. Mizoram-ah eng hna pawh dan ang zela lak a nih a, a thiam leh tling apiangte lak an nih hi MZP duhdan a ni tih sawiin MZP chuan hna lak hrang hrangte hi uluk takin a enzui zel dawn tih an sawi bawk. (AIR)
