Vawiin March ni 22, 2024-ah Mizoram EIACP Hub, Environment Education Programme (EEP) – Mizoram Pollution Control Board (MPCB) leh Govt. Johnson College atangin Eco Club leh Adventure Club-te tangkawp buatsaihin World Water Day 2024 lawm nân Tuikual Lui thian faiin an hnatlâng a, zirlai, zirtirtu leh official mi 80 vêl zet an thawkchhuak a ni.
Tuikual lui hi Aizawl tui tlan ber, Tlawng lui fintute zing ami niin a kum têlin kan tihbawlhhlawh belh zêl tih a lang a, hemi a nih avâng hian MPCB hotute chuan mipuite hnênah kan chhehvêl lui tuite thian faia uluk taka humhalh leh thianghlim taka enkawl a pawimawhzia inzirtirna ni pahfâwm turin ‘Tuikual lui thenfai hnatlâng’ hi buatsaih a nih thu an sawi. Hnatlânga thawkchhuakte chu kan chhehvêl leilung leh boruak humhalh kawngah tûn aia nasa-a ke pên zêl turin leh mi dang, kan chênpui leh thiante pawh chutiang anga ke pên ve tura tihhmuhtu ni theuh turin MPCB chuan a sâwm bawk a ni. (DIPR)
