March 25, 2024: Mizoram Bharatiya Janata Party(BJP) chuan April ni 19-a Lok Sabha MP inthlan lo awm tur atan an candidate tur chu President nilai Pu Vanlalhmuaka a ni tih vawiin khan an puang.
Mizoram BJP hian an candidate tura an chhawp chhuahte chu Central lama an hotute hnenah thawnin, an ni hian an pawmpui hnuah candidate tur an ti fel a; an President ni lai Pu Vanlalhmuaka chu vawiin khan an office-ah Official-in an puang a ni.
Heti hian, Lok Sabha MP inthlan a Mizoram seat neihchhun chuh turin, ZPM, MNF, Congress, BJP leh PC party te chuan an candidate turte an puang fel tawh a ni.
Tun tum Lok Sabha MP inthlan lo awm turah hian Mizoram pumah voters nuai 8,11,277 an awm dawn a; Vote nei tamna ber district chu Aizawl niin, mi nuai 2,88,268 an awm a, voters tlemna ber district chu Hnahthial a ni a, voters 16,257 an awm a ni. (DD)
