27 March 2024: Mizoram Lok Sabha inthlan April ni 19-a neih turah vawiin khan Mizo National Front Candidate Pu K.Vanlalvena, Congress Candidate Pu Lalbiakzama leh BJP Candidate Pu Vanlalhmuaka te chuan chuh turin hming an pe lut.
Vawiin hi Candidate te nomination thehluh hun tawp ni ani a, MP inthlan chuh tur hian ZPM Candidate Richard Vanlalhmangaiha, PC Party Candidate Pi Rita Malsawmi leh Independent Candidate Lalhriatrenga Chhangte ten hming anlo pe lut tawh a ni.
Nomination file zawhah chanchinbu mite zawhna chhangin MNF Candidate Pu K.Vanlalvena chuan ram kan hnam leh sakhua alo him theihna turin nasa zawka tan lak a tum dawn a ti a, tun parliament kal mekah a chhung leh pawnah nasa taka au a tul avangin hetianga au thei tur chuan Lok Sabha MP atan a chuh a ti a, Rajya Sabha MP anih laia a hnathawh en chungin zoram mipuiten vote thlak turin a duh tih sawiin Zoram mamawh chhhanna ni dawna a inhriat vangin a dingchhuak tih a sawi.
Pu Vena chuan NDA-a a thut tur chungchang sawiin, Mizo mipuite-ah a vote zawnna kawnga nghawng a neih a ringlo a ti a, BJP President Pu Vanlalhmuaka pawh a hranin an ding ve tho tih sawiin, NDA chu party 45 inzawmkhawm anni a ti a, Kristian state Nagaland leh Meghalaya-ah NDA thawhpui an sawrkar mek tih sawiin NDA chhung ngeiah BJP thil tha lo tih duhlotu tam tak an awm a ti a, pawn lam atanga do aia chhung lama do a that zawk tih hrechiangtu a ni tih a sawi bawk.
Congress Candidate Pu Lalbiakzama chuan Sakhaw zalenna bo ta leh hnam hnufual leh tenau zawkte palzutna tam lutuk ti bo tura hmalak a tum ati a, Party angin an beiseina a sang hle tih sawiin BJP-in UCC pass an tum chu Mizoram tan a himlo hle tih sawiin theihtawpa India ram intluktlanna tura bei turin a rawn ding chhuak tih a sawi bawk. (AIR)
