03 April 2024: ZPM Southern Hqrs Lunglei-in MP Election campaign kick-off leh mithar lawmluhna hun, vawiina ZPM Party Office, Lunglei-a neih chu Chief Minister Pu Lalduhoma’n a hmanpui a. An party zawmthar mi 279 a lawmlut nghal bawk niin kan thudawnna chuan a sawi.
He hun ZPM Southern Hqrs President Pu C.Lalhmingliana kaihhruaiah hian Chief Minister chuan hun hmasa lamah Lunglei Municipal Council (LMC) Councillor-te dintirin, eiru-a an hriat loh vang leh thuneihna hmangsual lova an hriat avangin lawmthu a hrilh a, LMC-in an kum khatna an hmang zo chiah chu lawmawm a tih thu sawiin Chief Minister chuan Lunglei khawpui mipuite chungah lawmthu a sawi a; LMC inthlanah za-ah za kan party min thlantlin sak a, chu chuan Mizoram pumah kan party boruak nasa takin min chawikang a, MLA inthlanah pawh hnehna sâng takin min hnehpui bawk a, lawmthu ka sawi a, lâwm-tha sût leh hi kan tum a, kan bâ a, kan la hre reng a, Election MCC-in min phuar rih vangin engmah kan ti thei lova, inthlan dawna kan thutiam in hre reng a, kan budget thar kan hmang ve thei dawn tawh a, kan hmabakah Lunglei kawng siamthat hi kan tum em em a, Election MCC min phuarna a zawh veleh Lunglei kawng siam hna hi top priority-ah kan dah a, hemi atana Rs vbch 3 kan dah chu PWD lamin a daihloh deuh an ring a, hma lo la zel phawt turin kan ti tih thu a sawi bawk a ni.
Kan hmaa MP inthlan lo awm turah Delhi lama sawrkar dawr tura state sawrkar min thawhpui thei ngei tur, Delhi kan kal zut ngai kher lova kan thawhpui theih tur kan thlan tlin a tul hle a, kan unau MNF Party President leh CM ni bawk leh Minister dangte’n an sawrkar laia a sawi thin kha dik ka ti a, state sawrkar thawhpui thei tur MP neih loh chu a pawi thin an tih ang khan kan sawrkar thawhpui thei tur thlang tling ngei ila, MNF lam te pawh hian khami kha hre rengin min thlantlin pui se kan ti khawp mai a ti a; inthlanah hian vote thlak kan uar tan a, a lawmawm hle a, uar zual zel ila, neutral mipui vote thlak an tlem hian party-a a tam tam an chak mai zel a, tun tumah pawh hian neutral zawng zawngte’n thahnem ngai taka vote min thlakpui leh turin ka sawm a ni, a ti.
A sawi zelnaah Pu Lalduhoma chuan sawrkar hmasaa Healthcare Scheme hnuaia damlohna tura mi mangangte bill bâ Rs vbch 50 zet chu Health Minister Pi Lalrinpuii thahnemngaihna zarah semchhuah theih a ni chu keimahni pawh hi kan lawm hle a, a bang pawh Rs vbch 4 lai a la ni, a ti a ni. Kan ram politics-ah hian Pathian ram thlentir kan tum a ni, a ti bawk.
