“Lok Sabha MP Inthlan lo awm tur chu Kristian Sakhaw dotute nen indona a ni” – ZDF President
07 April 2024: Zoram Decentralisation Front (ZDF) President Pu Lawmthanga chuan nimin Inrinni khan Lunglei Press Club-ah thuthar thehdarhtute kawmin; kan hmaa Lok Sabha MP Inthlan lo awm tur chu Kristian Sakhaw dotute nen indona a ni, a ti.
ZDF President Pu Lawmthanga chuan, ZDF chu political party kan ni lo chungin ram rorel danah tihhlawhtlin duh kan nei a, chu chu India Dànpui siamthat vawi 73-na tlawhchhana National Commission to review the working of the Constitution-in India hmarchhak state-te inrelbawl dan tur a siam zingah Mizoram inrelbawl dan tur a duan: Thuneihna leh mawhphurhna neia mipuiin khawtin leh district tinah ro kan rel ve theihna hi a hlawhtlin theihna turin a hrelo-te hnenah puangzar-a hrilhfiah turin ZDF hi ni 2nd April 2011-ah din a ni, a ti a. Mizoram-in kan aiawha Lok Sabha-a thu tur MP kan thlang dawn a, tun tuma MP kan thlan tur hi kum danga MP kan lo thlan tawh thin nen kan khaikhin chuan a boruak a dang hle ni-a sawiin; Central-a rorelna chelhtu BJP leh a thurualpui NDA hian democracy thlengin an pawngsual tawh a, tunah tak phei hi chuan mi pakhat chauh thu thu hi India ram rorel dan a ni mek a ni, a ti.
Pu Lawmthanga chuan, sakhuana lamah lek phei chuan Kristiante hi nêkchêpin India ram hmun hrang hrangah Kristiante tawrhna hi a nasa tawh hle a, Central-a sawrkarna chelh mektute hi an sawrkar leh a nih phei chuan Kristiante chu India ramah vote pawh nei ve tawhlo tur hiala hmalak rukna hi chak taka kalpui a nih pawh a rinawm a, a hlauhthawnawm tawh a, Kristiante leh Krista dotute Indona a lo ni ta, a ti.
Hetiang hi kan chunga thleng mek a ni chung pawhin BJP leh a thurualpui NDA-in sawrkarna an siam leh theih nan party thenkhat chuan tawngkam thiam takin Kristiante hnenah an candidate vote tling turin an tlangau a, democracy pawngsualna te, Kristiante nêkchêpa Right to Freedom of Religion palzutna te, Mizoram-a Kristian-te’n Pathian ram tana kan thilpek te leh Kohhran-ah thawhlawm kan thawh atang te leh Sunday School-ah thawhlawm kan thawh atangte lehzel pawha chhiah min chawitir tumtu BJP leh a thurualpui NDA support tumtute kan vote chuan kan lu chungah meiling kan chhêkkhawl tihna a ni tiin; ZDF chuan Lok Sabha Inthlan lo awm tura Mizoram aiawh atan NDA lam thlawplo tur thlangtling turin Kristian Sakhaw vuantu zawg zawng kan sawm a ni, a ti bawk.
