Ind candidate Pu Lalhriatrenga Chhangte chuan thlantlin anih chuan Mizoram leh hnam himna tur bakah thangthar thlenga chhawr tlak hmasawnna nei tura hma lak a tum thu a sawi
10 April 2024: Lok Sabha MP Inthlan lo awm tura independent candidate Pu Lalhriatrenga Chhangte chuan vawiin khan Lunglei Press Club-ah thuthar thehdarhtute kawmin; Mizoram aiawha MP-a thlantlin a nih chuan Mizoram leh hnam himna tur bakah thangthar thlenga chhawr tlak hmasawnna nei tura hma lak a tum thu a sawi a; Kristiante Pathian ringtu tan chuan thildang zawng aiin Pathian neihloh a hlauhawm ber, a ti.
Thuthar thehdarhtutute a kawmnaah hian Pu Hriata Chhangte chuan Lok Sabha MP a nih chuan kan thenawm– Myanmar leh Bangladesh ramte nen ei leh bar thawhchhuah ho theihna tur kawng dap leh inunauna hrisel nei tura hmalak a ngaipawimawh dawn tih sawiin; Mizorama leihnuai hausakna dapchhuah hna thawh mek chu chak zawka kalpui leh a hlawkna leh hna awm thei ang ang te Mizo thalaite’n an chhawr theih nan hma lak a tum tih a sawi a. Hei bakah hian Mizo thalaite tan Central Sawrkar hnuaiah hna tha zawk– UPSC leh Staff Selection te hnuaiah an hmuh theihna tura Training leh Empowerment Facility tha tawk tak ngaihtuahpui a tum thu leh Mizoram tana hma lak a tumna kawng hrang hrangte a tarlang.
Pu Hriata Chhangte chuan Delhi tlângah Mizoram MP aiawh pakhat chauh thinlung leh tihtakzeta Mizoram ngaihtuah tur MP neih a ngai, tiin; zaktheilo ringawt emaw huaisen satliah ringawt nilo, awmze nei MP kan neih a ngai a, chutiang tur chuan Mizo mipuite min vote vek turin ka sawm a ni, a ti a. In vote hian nangmahni tan vote in thlak a ni tih min hriatsak turin ka ngen che u a, in vote khat min pe ula in tan kum nga chhung hun ka pe ve ang, a ti bawk.
Zawhna chhangin Kristian ringtute tan chuan Hindu aiin Pathian neihloh hi a hlauhawm ber Pu Hriata Chhangte chuan tiin; hetih lai hian BJP-te’n an tum ber chu Kristian-te Hindu sakhuaa inlehtir ni lovin Hindu sakhaw kalphunga min kalpui hi an tum ber a ni a, hei erawh tribal hnam tan thil thalo leh harsatna nasa tak min thlen thei a ni dawn, a ti.
