10 April 2024: Mizo Zirlai Pawl (MZP)-te chuan zirlai hna zawng mek te’n Mizoram Public Service Commission (MPSC)-a an rinna an nghah zel theih nan MPSC Chairman chu bâng turin an ngen nawn.
Vawiina Aizawl Press Club-a chanchinbumite an kawmnaah MZP hruaitute chuan kumin 2014 February ni 1-a result a tihchhuah tak Combined Competitive Examinations kalpui danah thil fel tawk lo leh chhui chian ngai thil a awm ngeia an hriat thu leh hemi chungchang hi March ni 27 khan thuchhuah an lo siam tawh thu an sawi a. MPSC-in Mizoram-a hna sâng leh zahawm tak tak lak hna a kalpui thin tih sawiin, thalai hna zawng mekte pawhin an ring tawk hle thin a ni, an ti a. Hetih laia Combined Competitive Examinations kalpui hnuhnung berah Mains Exam paper thenkhatah correcting fluid-te hman niin, mark pek tawhsa thaichhiatna leh mark tihdanglamna hnuhma thahnem tak a awm thu an sawi a. Hei hi hmun hnih-khat mai ni lo hmun tam takah a awm a ni, an ti.
Hei bakah hian MPSC hian heng answer paper-te hi tunhma zawnga RTI Act hmanga dilchhuah an remtih thin laiin kuminah chuan an remti ta lo thut tih sawiin; a hnuah certified copy pechhuak lovin ‘inspection without photograph’ an phal leh a, nawrna avangin a hnu-ah phone-a thlalak an phal leh chauh a ni an ti a. MPSC hian an thil tih dik tawk loh avangin hlauh an neih vang a ni ang em? tih zawhna a awm phah hial a ni, an ti.
MZP chuan hei hi thleng tawhlo se an duh thu leh exam beitu lungawilo te an dawnsawn danah inenfiah se an duh thu an sawi a. MPSC Chairman chu tunkar chhung ngei hian bâng se an duh thu sawiin; an ngenna-in awmzia a neih loh chuan a ban ngei theih nan a tul anga hma an lak zel dawn thu an sawi a ni. (AIR)
