10 April 2024: Mizo National Youth Front (MNYF) hruaitute chuan Ningani hma ngeiin Mizoram sorkar hnathawkte hnena ngaihdam dil turin Chief Minister Pu Lalduhawma an phut tih an sawi.
Vawiina Aizawl Press Club-a thuthar thehdarhtute an kawmnaah Chief Minister Pu Lalduhawma chuan Shillong a zinnaah Mizoram sorkar hnathawkte chu a chhe thei ang bera puhin, “Pawl ang te, Association ang te, a Department pum angte a vawiinah hian min do let an tum mek a ni. A bik takin Police Department-ah chu chu a awm mek a ni’’ tih thu amah kawmtute hmaah a sawi tiin, MNYF Headquarters chuan mak a ti hle a, he thil hi thudiklo hmanga sorkar hnathawkte putchhiatna ni ngei a an hriat avang leh, a thusawi hi Mizoram sorkar hnathawk zawng zawngte hmai tibaltu anih avangin ngaihdam dil turin an phut tih an sawi a ni.
MNYF Vice President Pu Zodinpuia chuan thalai hnazawng mekte leh zirlaite’n tangkai taka an chhawr MSSSB chu chhan mumal awm lovin, ‘MNF sawrkar din a ni’ tih vang ringawtin thiah a ni, tia sawiin, vawiin thlengin MPSC thuamchak tura an hmalakna erawh Mizo mipuiten an la hre lo tih a sawi bawk.
