Union Minister for External Affairs chuan BJP Mizoram Vision Document a tlangzarh
11 April 2024: Union Minister for External Affairs Dr S.Jaishankar chuan vawiin khan Hotel Regency, Aizawl-ah kumin Lok Sabha inthlanpui atana an party manifesto BJP Mizoram Vision Document a tlangzarh.
Pu Jaishankar chuan Mizoramin hriselna kawnga hma a sawn theih nan Ayushman Bharat Card hmangin a thlawna inentir theihna Rs nuai 5 atanga Rs nuai 10 thleng mitin hman theih turin a siam dawn a ti a, Mizorama damdawiin hrang hrang thuam thatna tur Rs vbch 1000 dah bakah Zoram Medical College chu Regional Institute of Medical Science-ah hlan chhoh an tum tih a sawi.
Minister chuan zirna an ngai pawimawh dawn tih sawiin sawrkar school thuam thatna turin Rs vbch 300 ruahman a ni a ti a, sawrkar college siam that nan Rs vbch 450 ruahman ani tih sawiin Mizoram thalaiten kut themthiamna lama hma an sawn theih nan theihtawp chhuah an tum a ti a, tunlai thiamna hmang thiam chunga kutthemthiamna leh kutkawih eizawnna lama hmasawn tir chu an tum ani tih a sawi.
Minister chuan kuthnathawktuten hlawkna tam zawk an chan theih nan dahkham ngai lova loan awlsam tak Rs nuai 3 thlenga an lak theihna tur PM Kisan Niddhi Card nei zawng zawngte tan ruahman a ni a ti a, Mizorama Kuhva chingtute tharchhuah awlsam zawka an hralh theihna tur leh kuhva tawlhruk do anih theih nan Unique Identification siam a ni ang a ti bawk. (AIR)
