Ambassador-Designate to Myanmar-in Champhaiah District Official, NGO leh ramri behchhana sumdawngte meeting a neihpui
11 April 2024: Indian Ambassador to Myanmar mawhphurhna chelh tura ruat, Ambassador-Designate to Myanmar Pu Abhay Thakur, IFS chuan zing dar 9:00 khan Circuit House Champhaiah District Official, NGO leh ramri behchhana sumdawngte meeting a neihpui a, ramri dep khua Zokhawthar a tlawh nghal bawk.
Ambassador-Designate to Myanmar Pu Abhay Thakur chuan ram pahnih inkarah inlaichinna tha a awm theih nan kan zavaia tanrual a pawimawh a ni, a ti a. Security leh hmasawnna chu thil kalkawp tlat a nih avangin tun dinhmunah thil tih harsa rih mahse, nakin lawkah chuan ramri kaltlanga insumdawntawnna leh hmasawnna dangte pawh dan panggaia thawh leh theih a beisei thu a sawi a. Kalkhawmte chu zawh leh hriat duh an neihte bakah state leh central sawrkara thlen duh rawtna an neihte inthlahrung lova a hnena thlen turin a sawm a ni.
He hun kaihruaitu District Bawrhsap Pu James Lalrinchhana chuan India ram aiawha Myanmara ram palai hna thawk mai tur Pu Abhay Thakur an Champhai District a tlawh chu District tana hun chhinchhiah tlak tak a nih thu sawiin, Champhai District mipui aiawhin thinlunng taka an lo lawm thu a sawi a ni.
He hunah hian NGO te’n Free Movement Regime (FMR) tihtawp leh ramri hungte an do tlat thu an thlen a. Inkalpawhna kawngpui, raltlan chungchang, border trade, ramri kaltlanga ruihhlo tawlh ven chungchang leh pawimawh danga ngaihdan leh rawtna an neihte Ambassador-Designate to Myanmar hnenah hian an thlen bawk a ni.
Pu Abhay Thakur chuan meeting zawh hian Zokhawthar tlawhin ramri kaltlanga insumdawntawnna leh hemi kawnga hmalaknate enfiahin a zirchiang a. Land Custom Station Zokhawthar, Immigration Check Post leh Assam Rifles COB Zokhawtharte a tlawh a, hemi hnu hian Aizawl panin a let leh a ni.
