12 April 2024: Nungcha chilhlum hreh vanga nunna chan ta Lalrinchhana (37), Kawrthah khua chu Mizoram District hrang hranga Honorary Wildlife Warden-te chuan amah ralna leh chawimawina thuziak cheimawi vawiin khan an hlan.
Lalrinchhana hi Kawrthah khua Darchhûng Motor Workshop neitu Pu H. Lalnunsanga fapa niin Rengdil khuaah Motor chhe siam tur a awm avangin, tun thla ni 5 khan an ko a, Chawhnu dar 1:00 velah Kawrthah aṭanga chhuakin anmahni car-in, a nu nau fapa Lalthanpuia nen Rengdil an pan a. Ramrikawn/Perngo kawna kawngṭha leh ngil lai taka an tlan laiin an hmaa Sanghar kawngpui kâna a lo tlan chu chil a hlauh vangin a hel a. A helna lamah tuihawk luankawrah tla lutin a motor ke pawh a chhe nghal a, an chetsual phah ta a ni.
Chutianga nungcha tihhlum duh loh vanga nunna hial a chan chu Mizoram hmun hrang hranga District Honorary Wildlife Warden te chuan pawi an tiin amah chawimawina thuziak leh ralna sum chu Pu Lalmuankima Khiangte, Mamit District Honorary Wildlife Warden chuan Kawrthah khuaa an chenna inah vawiin khan a hlan a. Kawrthah khuaa DFO Staff te leh Branch YMA hruaituten an tawiawm a ni. (AIR)
