29 April 2024: Tukin zing dar 6:30 vel khan Govt Middle School-II Lungsen chu bungraw engmah chuh hman lovin a kang ral.
School hi a kan chhan hriat chian a ni lova, current kal sual avanga kang a nih rin a ni. Kangmei a chhuak tih hriat a nih hian thelh theih loh khawpin a lo kang nasa tawh a, veng chhung mi tlawmngaiten an hriat veleh rang takin thleng mahse thelh mih theih a ni tawh lo a ni.
School Building leh bungraw kangral hlut zawng hi Rs Nuai 45 vel ni a chhut a ni a, bungruate hi a kang chhe hneh hle.
Vawiin lam khan Lungsen Educational Staff Union leh mi tlawmngaiten bungrawh dahfel hna thawkin heng hnatlangte thingpui inna hi Thorang Bialtu MLA Er.R.Rohmingliana chuan a tum sak bakah mamawhna apianga hman atan Pu C.Lalnunnema, Vice President ZPM General Hqrs. Aizawl chuan Rs3,000/- a pek bakah ZPM Thorang Block-I chuan Rs2,000/- a pe bawk.
Govt Middle School-II kang hi Education Minister leh DM&R Minister hrilh hriat nghal a ni a, a hmunah DEO Lunglei leh SDEO Lungsen chuan an enfiah nghal a, school naupangte’n zirna an chhunzawm dan tur an ngaihtuahpui nghal a ni.
He chhiatna thleng hi MZP Hqrs Lunglei chuan pawi a ti hle a. He chhiatna thleng avanga an zirlai puite’n harsatna an tawh mek chu a rang thei ang bera thuneitute’n zir chianga zirlai naupangte’n an zirna an chhunzawm leh vat theih nan hma la turin MZP Hqrs: Lunglei chuan thuneitute a ngen a ni.
Mizo Zirlai Pawl Headquarters: Lunglei chuan he chhiatna thleng avanga zirlai harsatna tawk mekte tan hian theihtawpin hma a lak chhunzawm zel dawn tih thuchhuah siamin a sawi a ni.
