04 May 2024: Vawiin hi BCM hnuaia Fellowship Department pakhat Baptist Mipa Pawl (BMP) dincham vawi 44-na niin BCM hnuaia tualchhung Kohhran hrang hranga BMP Unit-te’n hemi pual hian hun an hmang.
BMP Day vawi 44-na thupui atan hian “Kristian Chhungkua” tih hman a ni a, BMP Unit engemawzat chuan zingkarah vantlang tana thiltha tih nana hmangin khawlai dung leh vantlang hmun thenfai hna an thawk a, hetihlai hian chhun lama vantlang tana tangkai zawnga hnatlang thawk leh intihhlimna hun atana hmanga ruai buatsaih BMP Unit engemawzat an awm bawk.
Zanin hian BMP Unit hrang hrangte chuan Pathian Biak inkhawm an hmang anga thupui “Kristian Chhungkua” tih hmangin thuchah sawitute’n an sawi dawn a, Zaipawl, Malzai leh Special Item hrang hrangte nen hun an hmang ang. Unit tam zawkah chuan inkhawm banah Thingpui ruai an kilho ang.
Baptist Mipa Pawl hi kum 1980 May ni 4 khan BCM Thingsai Kohhranah lo ding tanin tun dinhmunah BCM hnuaia Pastor bial 92 awm atangin Pastor bial 76-ah BMP Unit 315 din a ni tawh a, member 16,068 an awm mek a ni.
