07 May 2024: Land Owners Co-ordination Committee on NH 302, Lungsen/Rangte VC Area chuan vawiin khan Resolution siamin an pass a, NH 302 kawngpui laih meka zangnadawmna pek an la nih loh avanga hnathawh chhunzawm lo tura an hmalakna chu, CALA/Addl.DC Lungleiin hma a lakpuina zarah NHIDCL hmalakna hmuh a nih avangin, May ni 7, 2024, chawhnu dar 2:00 aṭanga May ni 25,2024 thleng chhunzawm leh remtih anih thu an tarlang.
An resolution pass-ah chuan, NH 302 kawngpui laihin a tih chhiat sak ram neitu mi 30 chuang lai te chuan Kawngpui ṭha neih thuai duhna avanga an ram te phal taka an laih chhiat tir mek laiin tun thlenga an ram tihchhiat vanga zangnadawmna pek a la nih loh avang leh ngaihsak an hlawh loh em avangin ram neitu intelkhawm pawl (Land owners co-ordination committee) chuan Dated 6 .4. 2024 aṭangin tiamchin awm lovin kawng laih hnathawh te chhunzawm lo turin hmalak a ni, tih an sawi a.
CALA/Addl.DC Lungleiin chak taka hma a lakpuina zarah NHIDCL hmalakna hmuh a ni a, hmunpui lamah compensation pek thuai anih theihna turin tihfel ngaite chak zawkin bawhzui mek a ni tih an hmu a, duhthusam la ni chiah lo mahse kawngpui ṭha neih thuai duhna avangin kawngpui siam hnathawh kal mek chu May ni 7, 2024, chawhnu dar 2:00 aṭanga May ni 25,2024 thleng chhunzawm leh remtih anih thu an sawi a. Hemi hun chunga Compensation hi pek fel emaw pek theih tura peih fel emaw anih chuan hmalak chhunzawm dan tur Co-ordination Committee-in a rel leh dawn tih an sawi bawk.
Kawngpui ṭha neih duh vanga engmah compensation la lova ram neituten an ram/assets te engmah dodal lova tih chhiat an remtih laia; kum 2 zet mai engmah ngaih sak lova NHIDCL-te an awm chu an dem takzeta, hetianga in nawr ngai ta hi pawi an ti takzet a, chak leh zuala hma laksaka tihfel sak thuai an beisei thu an sawi.
Thingtlang mirethei leh ram neitute dinhmun leh an lo inpek tawhna te hriatpui a, Dan leh thupek kenkawh kawngah pawh rilru zau tak put sak hram turin District thuneitute an beisei thu an tarlang bawk. An hmalakna kawngah he kawngpui sial hnathawktu bulpui ber, BRN Infra.Pvt.Ltd. hotute leh an hnuaia Sub.contractor-te’n an support-na avangin lawmthu sawiin, sum tam tak an hloh erawh pawi an tih thu an tarlang a ni.
