India leh Burma ramri hung tum leh FMR thiah tum duhlohna lantir nan Peaceful Rally huaihawt tum
09 May 2024: Zo Re-unification Organisation (ZORO) chuan tun thla ni 16 hian Zokhawthar leh Vaphai khuaah India sorkarin India leh Burma ramri hung a tum duhlohna leh Free Movement Regime (FMR) thiah a tum duhlohna lantir nan Peaceful Rally huaihawt an tum.
He thu hi vawiin khan Aizawl Press Club-ah chanchinbumite hmaah ZORO chuan an puang a. ZORO chuan Zofate chu an duh vang hi loin British sorkarin barhluih ramri a siamsak tih sawiin insuihkhawma pumkhata awm leh an inbeisei laia ramri hung tuma hmalak a ni chu an hriatthiam loh thu an sawi.
Zofate, ram pathum India, Burma leh Bangladesh-a an duh vang ni lo va thendarhte chu hnam khat then hran an nih avangin India sorkar chuan passport ngai lovin ramri atanga km 16 chhunga chengte Free Movement Regime hmanga intlawhpawh tawn a phalsak thu sawiin hei hi India sorkar chuan hnawk tiin thiah tumin hma a la tan mek tih an sawi a. FMR thiah a nih chuan unau thlahkhat thenhrana an awm dawn thu leh, nupui pasal lo inneih pawlh tawh an nih anga kawppui then tur pawh thahnem tak an awm dawn thu an sawi a. FMR thiah a nih loh nan ZORO chuan hma a la chhunzawm zel dawn tih an sawi a. Peaceful Rally an neih tur chu thlawp tur leh telpui turin Mizoram mipuite an sawm a ni.
