13 May 2024: Pu V. Malsawmtluanga MLA Vice Chairman HPC leh Lunglei North bialtu ni bawk chuan Mizo Footballer; India rama Mizote ti hmingthatu Lallianzuala Chhangte chu HPC Office Lungleiah chawimawina hun a hmanpui a, thingpui inpuina leh inkawmna hun an hmang.
Pu MST-a chuan Mizote ti hmingthatu Lallianzuala Chhangte chu a ngaihsan thu leh tet te ațanga Pathian tih tlat mi anih thu sawiin a thilitihnaah hlawhtlin tuma bei tlat mi leh taima tak anih thu a sawi a. Lunglei chhulchhuak hetiang Mizote ti hmingthatu kan nei chu lawmawm a tiin a chhuan takzet thu a sawi a. All India Football Federation (AIFF) Player of the Year for 2022-2023 a lo nih tawh thu leh kuminah pawh hian AIFF Player of the Year anih leh ngei a beisei thu sawiin duhsakna a hlan nghal a ni.
Pu MST-a chuan India Football League sang ber, Indian Super League (ISL) 2023-2024 Season khelh zawh taka Mumbai FC Champion puitu Player pawimawh tak leh Mizo ti hmingthatu, Indian Player zinga Season khat chhunga Goal khung tam ber anih lawmpuina thuziak a hlan a ni.
Lianzuala Chhangte pawhin, HPC Vice Chairman Pu MST-a chu naupan tet ațanga Football tuipuitu leh nasa taka fuih thintu anih thu sawiin, lehkha zir ngawr ngawr ni lo va, duhthlanna dang siam thei tura min fuihtu a ni a, tun dinhmun ka thlen theih nana mi pawimawh tak a ni, a ti.
