Chief Minister Pu Lalduhoma’n Lt. Gen RC Tiwari nen an inkawmnaah Mizoram leh Myanmar inrina Friendship Bridge Assam Rifle-te’n anlo khar chu thleng nawn tawhlo se a duh tih a sawi
22 May 2024: Chief Minister Pu Lalduhoma’n Sipai Lal Lt. Gen RC Tiwari nen an inkawmnaah Mizoram leh Myanmar inrina Friendship Bridge tunhnaia Assam Rifle-te’n anlo khar chu thleng nawn tawhlo se a duh tih a sawi.
Pu Lalduhoma chuan nimin tlaia Lt. Gen. RC Tiwari, General Officer, Commanding – in- Chief, Eastern Command nen an inkawmnaah he thu hi sawiin, tun hnaia Myanmar nena inrina chu Home Ministry leh Mizoram Sawrkar hriatpui lohin khar a ni a ti a, hetianga hmalakna chu thleng nawn tawhlo se a duh tih a sawi.
Chief Minister chuan Assam Rifle-te’n mipuite nunphung nghawng thei engemaw thiltih an neih dawnin state sawrkar nen inrawn tawna hma la zel turin a duh tih a sawi a, Zokhawsanga AR ram paltlanga loneitute feh kawng thar laih chu an ngai pawimawh tih sawiin AR Ground chu Aizawl lailia awm a nih avangin mipuiin an mamawh fo a, Politics thila punkhawm ni lo thil dangah pawh tun aia zalen zawka an hman theih a duh thu a sawi a, Mizoram sawrkarin nasa taka ruihhlo do tuma ke a pennaah nasa taka tan lak pui turin a sawm bawk a ni.
Lt. Gen RC Tiwari chuan Mizorama awm sipaiten Chief Minister ngenna leh rawtna chu an ngai pawimawh tur a ni a ti a, kawng tinrengah sawrkar an thawhpui dawn tih a sawi a. AR Ground hman chungchangah a nau te alo hrilh tur thu sawiin, Zokhawsang ram pawh a rang lama ngaihtuah a nih tur thu a sawi a, Ruihhlo do chungchangah theihtawp an chhuah pui dawn tih a sawi bawk. (AIR)
