23 May 2024: Chin state hmar lam Tonzang leh Cikha khua a Myanmar sipai hmunpuite Chin National Army (CNA) leh an thawhpui PDF pawl hrang hrangin an lak hnu-a indona kal zelah Mizoramah raltlan an la pun belh zel.
Nimin piah (Thawhlehni) leh nimin tuk thleng khan raltlan hi 55 an lo lut a, an zinga 46 hi Myanmar atanga lo lut an ni a. Thawhlehni a lo lut thar mi 44 te hi Hakha, Khawmawi, Falam, Tedim, Tahan, Tuingo leh Khampat atanga lo lut an ni hlawm a, Champhai district-a Zokhawthar-ah an la khawsa rih. Midang 2 lo lutte chu Saitual district-a Mimbung khua-ah an awm mek thung.
‘Mipui tangrual sipai’ an tih maite’n Chin state hmar lam khaw engemawzata Myanmar sipai camp an lak hnu hian Myanmar indo thlawhnate chuan helai bial vel hi a bomb zui zel a. Tonzang leh Cikha khua bakah Lungtak leh Phaitu-ah pawh bomb an thlak nasa hle a, bomb thlak avang hian biakin tiamin in 40 aia tlem lo a chhia ni a thudawn a ni. Nimin thleng khan silai ri a la reh lo niin an sawi bawk. Tonzan vela bomb thlak a nih avang hian Khawmawi leh Rihkhawdar khawmite chu ralkhelin nimin chawhma khan Zokhawtharah mi tam tak an rawn tlan lut a. Chawhnu lamah erawh chuan an kir leh vek ni a thudawn a ni.
Chin state hmarlama inbeihna nasa tak avang hian May ni 16 atanga Thawhtanni thleng khan raltlan 938 chu Champhai district-a Vaikhawtlang, Khuangphah leh Hnahlan-ah te an lo lut a. Hemi rual hian mi 168 chu Saitual district a Teikhang, Kawlbem leh Mimbung khu-ah te an lut bawk a. Chin state chhim lam Vairum, Salachhuah, Laty, Bakla, Piedo, Bakalei leh Tisavai khua atangte in raltlan 198 zet Siaha district-ah lo lutin Laki, Lomasu leh Lopu khua-ah te an awm mek bawk.
Anni hi Maraland Defence Force (MDF) leh Chinland Defence Force (CDF-Mara) te innghirnghona boruak a san tak avanga rawn tlanchhia ni a thudawn a ni. Chin state chhim lam tho Paletwa khua leh a chhehvel atangin Khumi hnam mi 22-te chu Lunglei district-a Khawmawi khua-ah an rawn ral tlan bawk a. Anni hi Arakan Army hel pawlin an tihbuai thin vanga rawn tlanchhia ni a hriat a ni.
Heti hian Mizoramah Myanmar atanga rawn ral tlan hi nimin thleng khan mi 35,489 an awm tawh ni a chhut a ni. (AIR)
