27 May 2024: Mizoram University Zoology Department-a Prof. H.T. Lalremsanga leh zirbinga beitu (research scholar) te chuan Rultuha chi thar an hmuchhuak.
Zirbingtute hian Mizoram hmun hrang hranga rul an zirchiannaah India rama rultuha record la awm ngai lo, Trimeresurus uetzi chu Mizoramah an lo awm reng a ni tih hmuchhuakin, he an zirchianna hi Indian Biodiversity scientific journal lian ber, Journal of Threatened Taxa volume 16 issue number 5 chuan May ni 26, Pathianni khan a tichhuak a ni.
Trimeresurus uetzi hi rultuha chikhat, vâng tak mai a ni a. Nikum khan German, Vietnamese leh French scientist tangrualte chuan Myanmar ramchhung, Mandalay atangin rannung chi thar a ni tih an hmuchhuak a. A lan danah chuan Rultuha pangngai, (Trimeresurus erythrurus) nen a inang leh hriat hran har tak, cryptic species an ni a, an DNA leh phuhlip zirchian erawh chuan danglamna an lo nei teuh a ni.
India ramchhunga Rultuha (Trimeresurus) chi hrang hrang record awmsa 20 ni thin kha 21 a ni dawn ta a, Mizoram bikah chuan kum 2022-a Champhai aṭanga hmuhchhuah tawh Trimeresurus mayaae tiamin rultuha species 4 record an awm ta a ni. (AIR)
