27 May 2024: Tunhnaia Rahsiveng leh Sazaikawn inkara Vawk thi paih chungchangah Lunglei Pig Fed Association-te’n FIR an thehluh hnuah District Veterinary Officer chuan Lunglei Police Station-ah vawiin chawhma khan FIR a thehlut veleh.
Hemi chungchanga DVO Pu Vanlalhruai’n kan palai a hrilh danin, Vawk thi paih chungchangah Lunglei Pig Fed Association-te’n FIR an thehluh chu lawmawm a tih rualin Department atang pawha FIR thehluh ngei tul an tih vanga FIR thehlut an ni a ti a, Vawk thi paihtute hi khawi veng ami nge, tute nge an nih tih chu Police-te’n chhuichhuak ngei se an duh tih a sawi.
DVO chuan, Vawk thi a lo awm leh anih pawhin Vety department-a thawktute hrilh hre vat tur leh thuk taka phum turin mipuite an ngen nawn leh tih a sawi a ni.
DVO Pu Vanlalhruaia chuan, kumin bikah Lunglei Dist chhungah ASF avanga Vawk thi department lam atang chuan an la hrelo tiin, hmun thenkhata Vawk lo thi palh pawh rang taka enfiah niin ASF hrikai an nih leh nih loh test tir nghal zel an ni a; Positive a la awm lo a ti bawk.
