10 June 2024: Vawiin khan ZPM Southern Headquarters, Lunglei chhung inkhâwm leh political session hun hman a ni a, Pu C.Thansanga President, Lunglei West Block-I chuan inkhâwm kaihruaiin, Upa TC.Lalchhandama Adviser, ZPM Southern Hqrs, Lunglei chuan Pathian thuchah a sawi.
Political session neih chhunzawm nghalin, Minister Pi Lalrinpuii chuan, ZPM chuan mipui hnena an intiamna a tihhlawhtling chho zel tih Pi Rinpuii chuan sawiin, Health Department hnuaia thawktu Doctor leh Nurse indaihlohna te pawh an hnawhkhat deuh vek tawh tih a sawi a. CSS te, Contract leh Provisional Employees, sawrkara hun rei tak lo thawk tawhte chu a tahtawla dah nghet turin Cabinet meeting chuan an pawmpui tawh tih sawiin, vawilehkhata a rual veka indah nghet tur erawh chuan harsatna tam tak a la awm avangin dawhthei taka kan nghah hram hram erawh a tul dawn a ti.
Pi Rinpuii chuan Mizoramah Lung natna vei kan tam ngaihtuaha Lung zaina khâwl sawrkarin a la nei lo chu, neih thuai a nih theihna turin chak taka hmalak mek a nih thu Health Minister chuan a sawi a. Hemi atan hian Lung Doctor thiam tak Delhi damdawi in lama thawk mek chu inremna an neihpui fel thawkhat tawh tih a sawi a. Hei bakah hian Mizoramah kal thlâk (kidney transplant) a nih ve theihna turin Health Minister anih anga chak taka hmalak mek a nih thu a sawi bawk.
