June 18, 2024: School Education Minister Dr Vanlalthlana chuan sorkar hmasain school 340 upgradation a lo kalpui tawh chu a taka chantir turin harsatna hrang hrang an tawk tih a sawi.
Vawiina a pisa-a thuthar thehdarhtute a kawmnaah School Education Minister chuan sorkar hmasain zirna in tih hmasawnna tura a hmalakna, school hrang hrang 340 upgradation chungchangah school 180 provincialisation, school 52 provisional adhoc Grant in Aid leh school 108 lump sum Grant in Aid dinhmun chawisanna danah rules leh notification siam that ngai tam tak a awm avangin sorkar hmasa Council of Minister meeting thuthlukna hmasa zawk chu thiatin enthat leh tura tih a nih thu a sawi.
Dan siam that ngai leh notification siam that ngaite buaipui nghal char char a ni tih leh dan thar pahnih chu DP& AR leh Legal Department phalna lak vek tawh a ni tih a sawi a, dan awmsa atanga ngaihhnathiamna an pek dan tur chin pawh ngaihtuah mek a nih thu sawi bawkin, school upgrade phu tak takte chu upgradation kalpui chhunzawm an nih dawn laiin, danin a phut anga building pawh nei lo, result nei chhe lutukte leh school naupang neih tlem lutukna school zirtirtute leh a enkawltute chu tang lehzual sauh turin an ngen tih a sawi bawk. (ddnewsmizoram)
