24 June 2024: Chief Minsiter Pu Lalduhoma chuan Lawngtlai Vengpuia In kang avanga boral Pi Sungṭiali leh Pi Darhliangi te chu Chief Minister Relief Fund atangin Rs.25,000 ve ve a ral an nih tur thu a sawi.
Nizan dar 7:00 vel khan Lawngtlai Vengpuia Pu Thangnawna (L) In Assam type chu bungrua engmah chuh hman loh vin a kang a, In chhunga awm Pi Sungṭiali kum 76 Pu Thangnawna (L) nupui leh Pi Darhliangi kum 70 Pu Thangnawna (L) farnu chu vanduaithlak takin an boral. Kangmei a chhuahlai hian Inah hian mi pathum awmin mipa pakhat chu tukverh lamah zuangchhuakin a him. Lawngtlaiah hian Inrinni zan atangin Power supply a awm loh vangin kangmei hi Mombati chhit atanga chhuak ni a an ngaih thu khawtlang hruaitute chuan an sawi.
Pu Lalduhoma chuan social media kaltlangin chhiatna thleng pawi a tih thu a sawi a, chhiat tawkte a tawrhpui thu leh an kalsan tak an chhungte chu Pathianin thlamuan se a duh thu a sawi a, hei bakah hian ral an nih tur thu hi a sawi lang nghal bawk a ni.
In kanna hmun hi nizan khan Lawngtlai East bialtu MLA, Dr. Lorrain Lalpekliana Chinzah, Lai Autonomous District Council CEM mawhphurhna la mektu Pu Lalropuia Chinzah bakah Lawngtlai DC office atangin official ten an tlawh nghal a, bialtu MDC Pu V.L. Hmuaka chuan thutchilhin, tukin khan Lawngtlai West bialtu MLA. Pu C. Ngunlianchunga pawhin chhiatna thlenna hmun hi a tlawh bawk.
Adviser to Chief Minister Dr. Lorrain Lalpekliana Chinzah chuan chhiattawkte chhawmdawlna sorkar atanga awmthei ang angte buaipui nghal a nihtur thu sawiin, chenna In dang sa turin theihtawp a chhuah tur thu a sawi a ni.
Vengpui khawtlang hruaitute chuan ruang tlak zawhah In kang senghawi dan tur leh In sak dan tur leh chhiattawkte chhawmdawl dan tur an ngaihtuah dawn. (AIR)
