Larsap-in Mizoram Peace Accord chu Remna Thuthlung hlawhtling tluantling awm tlem te zing a mi a ni, a ti
Aijal Club chuan nimin (June ni 28, 2024) tlai khan RB McCabe Hall, Aijal Club-ah Remna Thuthlung Ziah; (Signing of Mizoram Peace Accord) hriatrengna hun leh lawmna programme an buatsaih a. Governor Dr Hari Babu Kambhampati chuan Khuallian niin he hun hi a hmanpui a, thuchah a sawi nghal bawk.
Governor Dr Hari Babu Kambhampati chuan state puma mipui zawng zawngte duhsakna chibai a buk a. Governor chuan Remna a awm theihna tur te leh Mizoram tana hmalam hun êng zawk siam tura remna kawnga thawktu zawng zawngte chungah Governor chuan lawmthu a sawi a. Mizoram Peace Accord chu kan State tana beiseina eng leh midangte tan pawh, khawnvar anga chiang taka hmuh theih beiseina eng leh entawn tur, Remna Thuthlung hlawhtling tluantling awm tlem te zing a mi a ni a ti.
Governor chuan Remna Thuthlung Ziah a nih theihna atana theihtawp chhuahtu te – Pu Laldenga, Mizo National Front (MNF) Founder President, Mizote tana hruaitu nih tling, Pu Lal Thanhawla, Chief Minister, Remna a awm theihna atana a lalthutthleng thawhsan tu leh Pu Lalduhoma, Chief Minister ni lai, khatih hun laia MNF leh India Sawrkar inkara palai hna pawimawh thawktu te an ngaihsan awm tih a sawi a. Pu Zoramthanga, Pu Ch. Chhunga leh Brig. T. Sailo, Mizoram Chief Minister lo ni tawhte pawhin he Remna leh muanna hlu tak a lo awm theih nan an thawh hlawk hle bawk tih a sawi a ni.
He hunah hian Chief Minister Pu Lalduhoma pawhin Remna leh Muanna a lo awm theihna atana theihtawp lo chhuah tute inpekna chu a ropui a tih thu a sawi bawk.
