01 July 2024: Vawiin chawhma khan Govt. Primary School-II, Chanmari ah Stop Diarrhoea Campaign hawnna hun hman a ni. He hun hi Pi Lalrintluangi, District Education Officer, Lunglei chuan kaihruaiin Pu Lalramliana Papuia, MLA, Lunglei South chuan khuallian niin a hmanpui.
Pu Lalramliana Papuia chuan, Kawthalo kan vei loh nan kan in enkawl that a ngai a, khawvel pumpuia naupang kum nga chin hnuailam thihna thlentu pathum zinga pakhat a ni. Mizoram-ah pawh nitin mi 140 vel kawthalo vei an awm a chuvangin fimkhur a ngaih thu a sawi. Kan in, ek in te vawn fai a, tho bawm hnu te ei lo tur leh bawlhlawh bawm chhin nei hmang theuh turin a chah a ni. Health Department in July leh August, 2024 hi Stop Diarrhoea Campaign kalpui tur hi nuapang, nu leh paten zawm theuh turin a chah a ni.
Dr. Lalrinthangi, Dy. Chief Medical Officer, Lunglei pawhin thusawiin, Nikum khan Lunglei Disrict a naupang kum nga hnuailam te hnenah ORS 100% pek a ni a, kuminah pawh 100% pek tum a nih thu a sawi. District Hospital, Sub-Divisional Hospital, UPHC, Sub Centre leh Anganwadi Centre ah te ORS-Zinc Corner dah vek a, Anganwadi Worker ten in tin-ah kal chilhin naupang kum nga (5) hnuailam chin te ORS bur hnih leh Zinc ni 14 chhung ei an sem ang a, kawthalo hlauhawmzia leh invendan chungchang zirtirna an pe ang. Kawthalo laka kan him theih nan faina leh thianghlimna ngai pawimawh theuh turin mitin te a sawm bawk a ni.
