Lunglei Police te hmalaknaa Mobile phone bo leh ruk hmuh let te a neitute hnenah hlan let
05 July 2024: Vawiin chawhnu dar 1:30 khan Lunglei Police Station-a Cyber Cell te hmalaknaa Mobile phone bo leh ruk hmuh let leh Mobile Phone 13 Rs 1,96,700 man hu te chu a neitu dik takte hnena hlan letna hun hman a ni.
He hun hi Pu Zarzokima MPS, SDPO Lungleiin a hmanpui a; Lunglei Police Officer leh mobile phone neitute an tel bawk. He Pu Zarzokima MPS, SDPO Lunglei chuan, Lunglei Police Station-a Cyber Cell te hnenah lawmthu sawiin; heng chhui chhuah nan hian Lunglei PS hnuai ami Constable PC Lalhmingliani chu fakin, darkar 24 chhungte atul angin rim takin a chunga mawhphurhna an pek chu hlenin, a thawhrimna avanga hetiang zat mobile phone bo hmulet leh a ni hi fak tlak anih thu a sawi.
SDPO chuan Mobile phone bo hi Lunglei mai nilo, Mizoram leh India ram hmundangah a tam em em a, a ti botute tan uihawm tak ani a, chuvangin Lunglei Police te chuan te lua awm lovin, mobile phone tibo report awm tawh phawt chu a tam thei ang ber theihtawpin chhuichhuah sak zel an tum a ni, a ti. Tunlaiah IT lama changkanna umphak ve zel a tul thu sawiin tuna kan hlawhtlinna pawh hi Central Equipment Identity Register (CEIR) portal awmze nei taka kan hman tangkai vang a ni a ti. Tunlaiah sualna pung chho zel mila Police-te pawhin hmasawnna neih chhoh ve zel a tul thu a sawi a, mipuite chu hetiang mobile bo rinhlelhawm tih hre reng chunga lo leisak tute emaw, lo thlengtute emaw chungah pawh action an la zel dawn tih hre tura a duhthu sawiin, tun hnaiah hetiang diklo taka loleitu (receiver of stolen property) te hi man an nei nual tawh tih a sawi bawk.
Mobile phone hmuhlet a neitute hnena pek let te hi June thla 2024 chhunga chhui chhuahte an ni. Lunglei Police-te chuan mipuite hnenah thu chahin, Mobile phone second hand kan lei dawn reng rengin Black list nge White list a nih finfiah hmasak phawt hi a him ber a; Google search hmangin CEIR portal emaw Cyber Crime portal emaw atangin awlsam tein tute pawhin kan finfiah thei reng a ni, an ti.
Lunglei Police-te hian Mobile bo leh rukte hi Technology hmanga chhuiin, April thla atanga vawiin ni thlengin mi 37 te mobile phone an lo hmuhlet sak tawh a, a neitute hnenah hlan let vek a ni tawh a; hemi kaihhnawiha diklo taka lo leitute case siamsak an ni bawk.
