12 July 2024: Vawiin khan Lunglei District Information & Public Relations Officer thar Pu C.Lalhruaitluanga chuan a office chamber-ah Mizoram Journalists’ Association (MJA), Lunglei District member-te leh Akashvani Lungleia Aaj Subah News Presenter-te nen inhmelhriat nana thingpui inhona leh inkawmhona hun a buatsaih.
Lunglei DIPRO thar Pu C.Lalhruaitluanga chuan Lunglei chu district lian leh programme pawimawh tamna a nih angin duty chhuahna tur pawh a tam hle dawn nia a hriat thu sawiin, chanchinbu mite thawhpuina a mamawh dawn hle tih a sawi a. Chanchinbu chhuah ṭhat a pawimawh thu sawiin, sawrkar advertisement pek chungchangah tehfung pawimawh tak a nih bakah, chanchinbu mi hming pu chunga chanchinbu chhuah mumal lo nih chu a inhmeh lo hle tih a sawi. Thu thar theh darh leh puan chhuah kawngah thu dik, rin tlak leh belh chian dawl chauh chhuah ṭhin tur te, politic-a awn lam nei lo leh thu lai la taka thu chhuah ṭhin tur tea chahin, sawrkar thawhpui thiam a, sawrkar thu chhuakte ṭha taka puangzar ṭhin turin a ngen a. An thu chhuah leh puanzar reng reng chu a tam thei ang ber mipuite tana ṭangkai ni thei se ṭha a tih thu te, social media chi hrang hrang kal tlanga thu dik tawk lo theh darh awm ṭhin veng theitu ber an nih anga theih tawp chhuah tur leh an thu chhuah leh an thu puan hmanga mipuite hnena ṭawngkauchheh leh ziak dan dik zirtir theitu an nih inhre chunga ṭan la zel turin a chah a ni.
He hunah hian MJA Lunglei District President Pu Laltlanthanga pawhin thu sawiin, DIPRO tharin a hun hmasa lama chanchinbu mite nena inkawmna hun a buatsaih chu lawmawm a tih thu leh Lungleiin DIPRO ṭha tak tak leh fel tak tak an neih ṭhin avanga vannei an intih thu a sawi a. District MJA te chuan an theihna zawn apiangah DIPRO leh a thawhpuite chu puihbawm leh thawhpui an inhuam reng thu a sawi.
He huna tel member hrang hrangte pawhin DIPRO thar lawmna thu leh thawhhona ṭha zawk neih dan turte sawiin, Lunglei District mipuite tana awmze nei leh ṭangkai zawka thawhho dan tur kawng hrang hrang an sawiho a ni.
Tun dinhmunah Lunglei District-ah hian MJA member 20 awmin, sawrkarin accreditation a pek accredited journalist 19 an awm a. MJA member-te hi print media leh electronic media lama inhmang ni hlawmin, tunah hian Lunglei District chhungah MJA member-te enkawl chanchinbu chhuak 13 a awm mek a ni.
